ئەمڕۆ لە زۆرێک لە میدیاکانی کوردستاندا هەواڵی هاتنە مەیدانی خوێندکاران بۆ بەدەستهێنانی خواستەکانیان، وە بە تایبەت خواستی دەرماڵە، سەردێڕی هەواڵەکان بوو. خوێندکاران لە زۆر شوێن شەقامە سەرەکیەکانیان داخست و ڕێگایان لە هاتوچۆ گرت و سووربوونی خۆیان لەسەر بە دەستهێنانی مافەکانیان نیشاندا. مافێک کە ئەوان لە چەند ساڵی ڕابردوودا بە هۆی بە تایبەتیکردنی خوێندن و سپاردنی بە کەرتی تایبەت لێی مەحروم بوون و لییان سەندراوەتەوە. 

بە تایبەتکردنی هەموو کەرت و جومگەکانی کۆمەڵگا و شانخاڵیکردنەوەی ئەحزابی دەسەڵاتداری کوردستان و حکومەتەکەیان لە بەرامبەر هەموو بەرپرسیاریەتێکدا شتێکی تازە نیە. ئەم پڕۆسەیە ساڵانێکە دەستیپێکردووەو ڕۆژ لە دوای ڕۆژ بە لوتکەی خۆی دەگات. دەتوانین بڵێین کەرتەکانی تەندروستی و خوێندن لەم پێشبڕکێیەی دەسەڵاتداراندا بەدەرنەبوون، تەنها ئەوەندە نەبێت کە لە ڕیزی دواوەی لیستەکەیاندا بووە. ئەمڕۆ جگە لەوەی کە خوێندکارانی کوردستان وێڕای هەوڵەکانیان و هێنانی نمرەی زۆریش، وێڕای هەر تێبینیەک لەسەر ئەمە، لە هیچ یەکێک لە زانکۆ دەوڵەتیەکاندا جێگایان نابێتەوە و ناچاردەکرێن کە پارە بدەن بۆ تەواوکردنی خوێندنەکەیان و گەشتن بە خەون و خولیاکانیان. ئەمە وێڕای ئەوەی کە ئەم بارودۆخە ئابوریە قورساییەکی زۆری بۆ سەر خێزانە کرێکاریی و هەژارەکان دروستکردووەو دەبێت لە قووتی مەمرەومەژی ڕۆژانەیان ئەم پێداویستیانە بۆ منداڵەکانیان دەستەبەربکەن. خوێندکاران لە بەرامبەر دەسەڵاتێکدا قەراریان گرتووە کە دەستی ناوەتە بینەقاقایان و هەموو کۆمەڵگای ڕادەست بازاڕی بێ ڕەحمی سەرمایە کردووە و وەبەرهێنان و سەرمایەگوزاری لەسەر خزمەتگوزاریە سەرەتاییەکانی کۆمەڵگا دەکات و ئەوەی بە لایەوە گرنگە قازانج و کەڵەکەی سەرمایەیە نەک هیچ شتێکی دیکە.

خوێندکارانی کوردستان لە گۆشە و جێگای جیاجیای کوردستاندا دووبارە دەستیان داوەتە خۆپیشاندنان و ناڕەزایەتی دەربڕین بەرامبەر لێسەندنەوەی ئەم مافە سەرەتاییەیان. ئەوان ئەگەر لە شەش بۆ حەوت ساڵی ڕابردوودا لە بەرامبەر پێدانی دەرماڵەکانیاندا بیدەنگکرابوون بە بیانووی نەبوونی داهات و دابەزینی نرخی نەوت و نەهاتنی پارەوە، ئەوا ئەمڕۆ لە بەرامبەر دابینکردنی دەرماڵەکانیاندا هاتنەوە مەیدان. دەرماڵەیەک کە لە ڕاستیدا وەک ئەوە وایە بڵێیت موویەک لە بەرازبێتەوە ئەگەر نا ناتوانێت لە کاتی دابینکردنیشیدا وەڵام بەو هەڵئاوسان و گرانی و نەبوونی ئەو پێداویستیە سەرکیانە بداتەوە کە خوێندکاران بە دەستیەوە دەناڵێنن.

حکومەتیک کە گەنجانی ناچارکردووە ڕێگای هات و نەهاتی کۆچ بگرنەبەر و ببنە قوربانی دەریا و زەریاکان و ڕەقبوونەوە لە دارستانەکان دا، حکومەتێک کە لە ڕێگای کۆمپانیا گەشتوگوزاریەکانیشیەوە هەر لە هەوڵی سەرمایەگوزاریدا بێت و هیچ بەهایەکی مرۆیی بۆ گرنگ نەبێت، ناتوانرێت چاوەڕوانی دابینکردنی دەرماڵە و پێداویستیەکانی خوێندنی لێ چاوەڕێ بکرێت. ئەم حکومەتە هیچ چاوەڕوانیەکی لێناکرێت کە ئەم دەرماڵانە بۆ خوێندکاران بگێڕێتەوە مەگەر لە هاتنەمەیدان و نەبەردێکی چیانەیەتیدا کە ئەژنۆکانی بهێنرێتە لەرزە لە ڕێگای کاری بەردوام و خۆڕێکخستن و خەباتی بەردەوامەوە بە ڕابەرایەتی پڕۆلیتاریای شۆڕشگێڕ و ئاگا بە بەرژەوەندییە چینایەتیەکانی خۆی2021.11.21