ڕۆژی جیهانی کرێکار لە مساڵدا، دەنگ وهاوارێکی جیهانی و ئینتەرناسیونالیستی بوو. خواست و بزووتنەوەیەکی چینایەتی و هاوارێک بوو دژی برسێتی و بێکاری وگرانی. دەنگێک بوو درا بە گوێی بورژوازی جیهانی و سیستمەکەیاندا. دەنگێک، بەڵام زەنگێکی ترسناک بوو دژ بە دەسەڵاتی بورژوازی لە هەموو دونیادا.
خواستی زیادکردنی کرێ-مووچە- داوایەک بوو لە ١ی مەی ئەمساڵدا لە پاریس و ئەسینا و ئەستانبوول و بانکۆک و ریبات و قاهیرە و ساوباولۆو سیئۆلەوە تا دەگاتەوە ئێران و تونس ... وەک خواستێکی سەرتاپاگیری پڕۆلیتاریای جیهان، لە ڕۆژێکدا بەبێ جیاوازی نەتەوە و ئایینەکان و ڕەنگی پێست و ڕەگەزی ئینسانەکان خرایە سەر مێزی دەسەڵاتی بورژوازی. خواستی بەرزکردنەوەی مووچە، پڕۆلیتاریای جیهانی لە دەوری خۆی کۆکردەوە.
داواکاری بەرزکردنەوەی مووچە لە سایەی هەلومەرجی قەیرانی قوڵی ئابوری سەرمایەداری جیهانیدا، لەسەردەمی پەتای کرۆنا و جەنگی نێوان ڕوسیاو ئەمریکا لە ئۆکرانیادا، بەشێوەی جیاواز و بەپێی تایبەتمەندی وڵاتەکان لەلایەن پڕۆلیتاریاوە، بە دەنگی بەرز خرایەڕوو. شێوەی جیاوازی وەک: بەرزکردنەوەی لایەنی کەمی کرێ، دژی بەرزبوونەوەی نرخی کاڵاکان و بەتایبەت خواردەمەنیە سەرەکیەکان و سوتەمەنی و خواستی عەدالەتی کۆمەڵایەتی و زیادکردنی مووچە ... بەڵام هەموو شێوە جیاوازەکان، جەختکردنەوەیە لە سەر: بەرزکردنەوەی کرێ، بەرزکردنەوەی لایەنی کەمی کرێ.
ڕابەرانی پڕۆلیتاریا لە ئاستی وڵاتە جیاوازەکاندا، پێویستیان بە کۆبوونەوە و کۆمەڵەیەکی پڕۆلیتارییە، بەدەوری خواستی بەرزکردنەوەی مووچە و لایەنی کەمی ئاستی کرێ و بەرزبوونەوەی بەشێوەیەکی ساڵانە بە لە بەرچاوگرتنی گرانبوونی پێداویستیەکانی ژیان و ڕێژەی بەرزبوونەوەی هەڵئاوسان. کۆمەڵەیەک کە ناوکۆکەی ئەنتەرناسیۆنالیستێکی سۆشیالیستی پڕۆلیتێری دەخاتە سەر ڕێچکەی واقعی خۆی.
ئاڕاستەی مارکسیستی هاوچەرخ
٢٠ی مەی ٢٠٢٢
